အမှတ်တရနေ့
၂၀၁၃-ခုနှစ်၊ ဖေဖေါ်ဝါရီလ(၂၈)ရက်နေ့ဟာ လွမ်းဘဝအတွက် အမှတ်တရဖြစ်ရတဲ့နေ့လေးပါ။
မောင်… လွမ်းကို ခွဲသွားတာ (၉) နှစ်ပြည့်တဲ့နေ့ပါ။
မနက်မိုးလင်းကတည်းက မောင့်ကို တစ်နေ့လုံး သတိရနေမိပါတယ်။
မောင့်ဓာတ်ပုံကိုကြည့်ပြီး လွမ်းကို ခွင့်လွှတ်ဖို့ မောင့်ကို တောင်းပန်နေမိပါတယ်။
လွမ်း… စိတ်ကစားပြီး တစ်ပါးသူကို ချစ်ခဲ့မိပေမဲ့ မောင့်နေရာမှာ အစားထိုးဖို့ ဘယ်တုန်းကမှ စိတ်မကူးခဲ့ပါဘူး။
မောင်နဲ့ အတူနေခဲ့ဖူးတဲ့အချိန်လေးတွေကို ပြန်အမှတ်ရပြီး မျက်ရည်ဝဲမိပါတယ်။
လွမ်းကို ထားခဲ့ရက်တယ်ဆိုပြီး မောင့်ကို အပြစ်တင်သလိုဖြစ်ခဲ့ပေမဲ့ မောင်ကိုယ်တိုင်တောင် မသိလိုက်ရတဲ့အဖြစ်မျိုးနဲ့ လွမ်းကို ခွဲခွာသွားတာကို တွေးပြီး စိတ်မကောင်းဖြစ်မိပါတယ်။
လွမ်းတယ် မောင်ရယ်။ လွမ်း မောင့်အတွက် ရည်စူးပြီး အိမ်မှာ ဘုရားပန်းလဲ၊ သောက်တော်ရေကပ်ပြီး မောင်နဲ့တကွ အားလုံးသောသတ္တဝါတွေကို အမျှအတန်း ပေးဝေပါတယ်။
အလုပ်ကအပြန် လွမ်းလှူနေကျ ဘုန်းကြီးကျောင်းကို ဝင်ပြီး ဝတ္ထုငွေနဲ့ J-Donut မုန့်ဗူးကို ကပ်လှူပါတယ်။
ဘုန်းဘုန်းကလည်း လွမ်းကို ရေစက်ချခိုင်းပြီး လွမ်းချစ်သူအတွက် ဆုတောင်းပေးပါတယ်။ အမျှပေးဝေပေးပါတယ်။
ဖေဖေါ်ဝါရီလ (၁၁) ရက်နေ့မှာ မွေးခဲ့တဲ့မောင်က ဖေဖေါ်ဝါရီ (၂၈) ရက်နေ့မှာ လွမ်းကို ထားခဲ့ပြီး ပြန်မလာနိုင်တော့တဲ့နေရာမှာ ရောက်နေပါပြီ။
မောင်ပေးထားခဲ့တဲ့ အမှတ်တရများစွာနဲ့ လွမ်းကျန်ရစ်သူအဖြစ် ရှိနေဆဲပါ။
မောင့်အတွက် ဒီစာလေးကိုပဲ အမှတ်တရရေးဖြစ်ပါတယ်။
မောင်… ရောက်ရာနေရာမှ လွမ်းကို သတိရနိုင်ပါစေ။
မောင်… အဝေးတစ်နေရာကို ခရီးထွက်နေတယ်ဆိုတဲ့စိတ်လေးနဲ့ လွမ်း…နေပါ့မယ်။
လွမ်းဧကရီ
၂၈-၀၂-၂၀၁၃
ည ၉:၀၅ နာရီ
