ပျံသန်းခြင်းမိုးတိမ်
…..မိလွမ်းကတော့ ချစ်လိုက်ရတာ…..
ဟေ့ဒီမယ်…မိလွမ်း
အဲ့ဒီအလွမ်းတွေကြားမှာ အရင်းလည်းမရှိ အင်းလည်းမရှိ
ဒီအလွမ်းတွေကိုပဲ သောက်သုံးနေရတာ
သိကောင်းပါရဲ့ကွာ
Online မှာ လာခေါ်တာနဲ့
ကြည်နူးရတာ၊ ပျော်ရွှင်နေတာ
သိစေချင်တာ
လွမ်းဆန္ဒပါ…
အထီးကျန်သူရဲ့
တမ်းတမှုတွေ၊ လွမ်းဆွတ်မှုတွေ
ပြေပျောက်နိုင်တာ
မင်းလေးကြောင့်လို့
…..မပြောပေမဲ့ သိနေမှာပါ…..
အဲ့ဒီပျော်ရွှင်မှုတွေကိုပဲ ရွာချနေခဲ့တဲ့
နွေနွေ… မိုးမိုး… ဆောင်းဆောင်း… ငါ့ဆန္ဒပဲ
နွေဆိုလည်း အတူအရိပ်အောက်မှာ ပျော်မယ်
မိုးဆိုလည်း အတူထီးဆောင်း တွဲလျှောက်မယ်
ဆောင်းဆိုလည်း ကိုယ့်ရင်ခွင်ထဲ ဝင်နေချင်တာ
…..မိလွမ်းဆန္ဒပါ…..
ငြိမ်းချမ်းရေးနဲ့ အိပ်စက် ငါ့ရင်ခွင်ကို
လရောင်နဲ့ ယက်လုပ်ထားတယ်
နွေးထွေးမှုနဲ့ လုံခြုံမှုအတွက်
ကိုယ့်ရင်ခွင်မှာ ခိုနားမယ်
သာမညကောင်က သာသာယာယာ
တေးသီချင်းတစ်ပုဒ် အမြဲသီဆိုနေမယ်
မိလွမ်းအတွက်
ကိုယ်ဆိုပြတဲ့သီချင်းလေးက
…..အမြဲ လတ်ဆတ်နေမှာပါ…..
ကြည့်လိုက်ကြည့်လိုက် ငါ့ရင်ခွင်ကို ကြည့်လိုက်
ခုန်နေတဲ့ နှလုံးသံတွေက မင်းအတွက်ချည်းပဲ
အဲ့လိုပြောလိုက်လို့ မင်းငါ့ကို သရော်နေမလားပဲ
…..ခုတောင် မင်းမျက်နှာလေး ပြုံးလို့ရွှင်လို့…..
ကိုယ့်ရင်ကို ခိုနား
ကိုယ့်နှလုံးခုန်သံလေးကြောင့်
ရင်ထဲက ပီတိ
လွမ်းမျက်နှာမှာပေါ်နေလို့
ကိုယ် လှောင်ပြုံးပြုံးမှာ
…..ရှက်လိုက်တာ…..
အဲ့ဒီမပွင့်တစ်ပွင့်ရှက်ပြုံးလေးက
ရှပ်ပြေးယာဉ်တစ်စင်း ခုတ်မောင်းသွားသလို
မင်းရဲ့ မပွင့်တစ်ပွင့်အကြည့်က
ငါ့ရင်ကို ခုတ်မောင်းစေတယ်
ငါ့နှလုံးသားရဲ့ အော်သံက
မိုးကြိုးပစ်လိုက်သလိုပဲ
အဲ့ဒီထဲမှာ ချစ်တယ်ဆိုတဲ့အသံ
ထည့်ပစ်လိုက်ချင်ရဲ့
ကိုယ့်အပြောလေးက
လွမ်းရင်ထဲမှာ
လှိုင်းပေါ်က လှေလေးလိုပဲ
မတည်ငြိမ်လည်း
ငြိမ့်ငြိမ့်လေးနဲ့
…..စီးချင်နေမိတယ်…..
အဲ့ဒါ မင်းက ငါ့ကို မယုံကြည်တာပဲ
မုသားနဲ့ဆိုတယ်လို့များ မင်းထင်ရော့လား
ဒီမယ် မိလွမ်း
အဲ့ဒီလှိုင်းတွေလို လှုပ်ခတ်နေတာ ငါ့နှလုံးရဲ့
ခုန်သံပဲ
ရဲရဲကြီးလိုက်ခဲ့စမ်းပါ
တက်မရှိတောင် ငါ့လက်နဲ့ လှော်ခတ်နေမယ်
…..ငါ့အသက်ရှိနေသ၍ပေါ့…..
ယုံချင်ခဲ့လို့
ကမ်းတဲ့လက်ကို လှမ်းခဲ့တာကို
…..ကိုယ်လည်းသိမှာပါ…..
တွဲလက်တွေခိုင်မြဲ ခိုင်မြဲတဲ့လက်နဲ့အတူ
ကမ္ဘာ ကမ္ဘာ သင်္ချေ
လွတ်လပ်တဲ့ ကောင်းကင်မှာ
ပျံသန်းကြတာပေါ့
ကိုယ်နဲ့အတူဆိုရင်
စင်္ကြဝဠာအနှံ့ လျှောက်သွားရလည်း
မမောပန်းဘဲ
…..ပျံသန်းမယ်…..
ပျံသန်းခြင်းမိုးတိမ်လေးတွေလိုပေါ့
…..ဘာအတားအဆီးမှမရှိ ပျံသန်းသွားကြတာပေါ့…..
တိမ်ပြာ + လွမ်း
၀၆-၀၇-၂၀၁၀
ည ၁၁:၁၂ နာရီ
